Ngurare ina nyanyukilwa iilonga yuupale womaudhano moNkurenkuru

Omuprimaminista Elijah Ngurare okwa popi kutya ina nyanyukilwa iilonga yokutunga uupale womaudhano moNkurenkuru moshitopolwa shaKavango Uuninginino nokwa popi kutya kawuli nande pandondo yopashigwana. Ngurare ndhoka okwe dhi popi pethimbo a talelepo uupale womaudhano moNkurenkuru, mOlyomakaya. okwa holola okwaauvanawa kwaashoka a li a lombwelwa kutya uupale mondolopa ndjoka owa manithwa nale nowuli pandondo yopashigwana. Ando okwa li inaandi ya ko huka ndi italele ko mwene, ando inandi tseya shoka wu li,”osho minista a popi ngaaka. Shoka osha landula konima yomumvo sho epangelo okwa li lya tseyitha kutya otali ka tunga uupale womaudhano miitopolwa ya yooloka moshilongo ashihe. Aaleli moshitopolwa shoka, oya lombwele Ngurare kutya oshimaliwa shokutunga uupale opo shi li ashike, oya taalelwa kuupyakadhi wokumona oshimaliwa shoka meendelelo naashoka otashi yi shongolitha etungo lyuupale. Ngurare okwiindile elelo lyoshitopolwa shaKavango Uuninginino osho wo aakuthimbinga ya longele kumwe opo ya kuthe po omainda ngoka taga yi moshipala iilonga yokutunga ooprojeka dhokutunga uupale yo ya popye naamboka ye na oshinakugwanithwa shokugandja oshimaliwa. “Longeleni kumwe. Inamwiikondjitha. Otuneni oshindji shoka tuna okupondola pamwe. Otwa hala okumona uupale mbuka wa manwa,”osho a popi ngaaka. Okwa popi kutya oshitopolwa osha pumbwa okukala nuupale womaudhano mboka wu li pondondo yopaigwana nokwiindile mboka ye na oshinakugwanithwa ye endeleleke etungo lyuupale mboka. Ngurare okwa popi kutya aakuthimbinga yomaudhano moshitopolwa shaKavango Uuninginino oya pumbwa okutungilwa uupale wongushu, wuna okangwena kafa naanaa hoka taka adhika muupale womaudhano mboka tawu tungwa miitopolwa yilwe moshilongo. Okwa gwedhapo kutya uupale womaudhano wa tungwa nawa otawu eta oompito kaagundjuka osho wo okuyambulapo omaudhano moshitopolwa. MuJanuali, omupresitente Netumbo Nandi-Ndaitwah okwa gandja oshinakugwanithwa momake goongoloneya yiitopolwa ayihe moshilongo opo ya kwatele komeho etungo lyuupale womaudhano miitopolwa yawo. Uuministili womaudhano owo odheka oshimaliwa shi li poomiliyona N$5 okutungitha uupale moshikandjogololo kehe – miikandjohogololo 121 moshilongo. Onzonkundaneki ndjika muApilili oya kundaneke kutya iitopolwa 14 moshilongo oya pewa kehe (oshimaliwa shoomiliyona N$10) okutungitha uupale womaudhano uyali, naashoka otashi ti okwa gwandjwa oshimaliwa shoomiliyona N$140 okutungitha uupale 28. Ashike nando ongaaka, oodokumente odhu ulike omakonakono kutya okapale kamwe okena okukotha oshimaliwa shi li poomiliyona N$25, ano oshimaliwa shivule shoka sha gandjwa. The post Ngurare ina nyanyukilwa iilonga yuupale womaudhano moNkurenkuru appeared first on The Namibian .