Epangelo lya pewa uusama sho lya gandja omahooli momake gaVitol

Epangelo uunambo olya pewa uusama koyendji mEgumbo lyoPashigwana sho taku hokololwa lye ende pambambo ehangano lyomahooli lya yama kepangelo lyaNamcor, okugandja oteendela yokweeta omahooli moshilongo yoobiliyona N$7.2 kuVitol Bahrain. Vitol Bahrain EC oshitayihangano shehangano enene lyokulanditha iikwankondo muuyuni lyedhina Vitol. Omupresitente gwongundu yompilameno yo- Popular Democratic Movement, McHenry Venaani oshiwike shika okwa pula omuprimaminista Elijah Ngurare kombinga yoshikumungu shoka. Venaani okwa pula i ikwatelela keikwato pomutima lya hololwa kwaangoka a li minista gwopevi gwemona nokwa li wo omukuluntuwiliki ta kwathele moNamcor, Maureen Hinda-Mbuende, ngoka omasiku ga zi ko a zi mokalungu e li ompinge negandjo lyotendela kuVitol. “[Hinda-Mbuende] okwa gandja omaiyuvo ge kutya omahooli getu otaga kala moshiponga sho kwe endwa pambambo Namcor [mokugandja otendela kuVitol e ete omahooli moshilongo paukililo]. Inandi uva mwa tya ko sha ongepangelo, nonda tega ngoye ongomutse gwepangelo wu ye mEgumbo lyOpashigwana wu yelithe kombinga yoshikumungu shoka,”osho Venaani a pula ngaaka. Okwa pula kutya omolwashike Namcor, ngoka e na ompungulilo yomahooli ndjoka ye etwa po koshimaliwa oshindji oye itaa longithwa motendela ndjoka. Venaani ndhoka okwe dhi popi sha landula sho Hinda-Mbuende a nyana egandjo lyotendela ndjoka kuVitol, nokwa londodha kutya okugandja otendela ndjoka opo Vitol e ete omahooli moshilongo paukililo pwaana olunyalwa lwaNamcor otashi ka lyatela pevi ongeshefa nenge omalandithilo moshikondo shomahooli. Mokuyamukula kwaashoka, Ngurare okwa popi kutya Okabinete okanongele omakemo nomaipulo kombinga yoshikumungu shotendela ya pewa Vitol e ete omahooli moshilongo paukililo. “Itatu shi patana kutya omahooli oge li oshinima shopashigwana. Kashi shi oshikundathanwa shopokati ketu nangoye. Ndele oshikundathanwa shoka sha pumbwa oonkundathana dhopankatu yoshigwana,”osho a popi ngaaka. Ngurare okwa gwedhapo kutya okwa simaneka omadhiladhilo gaHinda-Mbuende unene tuu okutala kontseyo ye moshikondo shomahooli, nokwa popi kutya okuna okukala e na euveko enene ngele otashiya kiilonga yaNamcor. Omuprimaminista okwa popi kutya epangelo onkene li itula mo mokushilipaleka kutya Aanamibia oya pewa omahooli ge li kondando tayi vulika. “Otuna okushilipaleka kutya Aanamibia oya mona omahooli kombiliha notaye ga pewa nuupu. Ngele opuna omayinda nena natutuleni uukuni kumwe tse tu ga kundathane,”osho a popi ngaaka. The post Epangelo lya pewa uusama sho lya gandja omahooli momake gaVitol appeared first on The Namibian .