Omufekelwa medhipago a longitha ombaanga yomukulupe muukengeleledhi wopashimaliwa

Omufekelwa gwedhipago Petrus Shikwaya (22) otaku hokololwa a longitha omayalulo gombaanga ya yinakulu, Hilma Uutsi (65) okupititha oshimaliwa shoka sha longithwa omiyonena. Ndhoka odha popiwa mEtitatu mOmpangu yaMangestrata fwaNdangwa, pethimbo lyiihokolola yonkambadhala yokupewa oboloha. Shikwaya gumwe gwomaafekelwa yahamano mboka taya tamanekelwa olunyala meponokelo lyomutamaneki gwomOndangwa, Justine Shiweda, moshiningwanima shoka sha ningwa muKotoba omumvo gwa zi ko. Epangelo otali tamaneke kutya hekulu yaShikwaya, Abner Mateus, oye kwa li u unganeke eponokelo ndyoka eshi ningi e li mondholongo. Poshiponokela shoka otaku hokololwa Shiweda(32) a yahwa lwiikando iheyali nokwa tilwa uuzigo. Okwa mana oondjenda numvo muFebuluali. Pethimbo lyiihokolola yoboloha uunambo, omutamaneki gwepangelo Yukai Kangira, okwa pula Shikwaya a yeleke iifuta oyindji yiimaliwa mbyoka [Shikwaya] a tumine kombaanga yomukulupe. “Owuna ongeshefa nomukulupe Hilma Uutsi? Ongoye ho longitha omayalulo gombaanga yomukulupe? Opwa kala iifuta oyindji okuya kombaanga yomukulupe okuza komayalulo gombaanga yoye yopangeshefa osho wo yopaumwene,”osho Kangira a pula omufekelwa ngaaka mompangu. Omutamaneki ina popya kutya ingapi ya tuminwa kombaanga yomukulupe. Shikwaya okwa yamukula kutya ina tumina nande yinakulu oshimaliwa kombaanga, ashike yinakulu oye kwa li e mu tumine oshimaliwa kombaanga ye opo a ka lande iilandithomwa yomongeshefa ye [yomukulupe] ndjoka yi li momudhingoloko gwaTjinene moshitopolwa shaMaheke. “Ngame kapuna nande oshikando nde mu tumina oshimaliwa,”osho Shikwaya a lombwele ompangu ngaaka. “Ito lombwele ompangu uushili. Owa longo uukengeleledhi wopashimaliwa okupitila momayalulo gombaanga ya kuku Hilma Uutsi,”osho Kangira a popi ngaaka, sho ta pataneke Shikwaya. Omutamaneki okwa gwedhapo kutya Shikwaya okwa pewa wo oshimaliwa shooN$3 800 okuza kuPetrus Shimuningeni momasiku 9 gaSeptemba omumvo gwa zi ko. Lyo esiku ndyoka olyo taku hokololwa Shikwaya a ka landa omuti guuzigo ngoka gwa longithwa okudhipaga Shiweda. Kangira okwa popi kutya Shikwaya okwa li wo a pewa oshimaliwa shooN$35 000 okuza kuNelson Kazombiaze, ngoka wo ta tamanekelwa pamwe naMateus moshimbuluma shilwe sha yooloka. Pauyelele wa gandjwa kuKangira, Kazombiaze ota tamanekelwa olunyala moshipotha shoka taku hokololwa sha hwahwameke eponokelo lyaShiweda. Shikwaya okwa li a kalelwapo kuhahende Murray Shikongo, niihokolola yoboloha oya tsikile ohela. The post Omufekelwa medhipago a longitha ombaanga yomukulupe muukengeleledhi wopashimaliwa appeared first on The Namibian .