Oilyo yoLPM oyo ya ‘tulwa pedu’ ya kelelwa momutumba koKeetmanshoop

Eleleo longudu yoLandless People’s Movement (LPM) ola hoolola liha yandje omatomeno okukufa moilonga mayola wodoolopa yaKeetmanshoop Melody Swartbooi mexuliloshivike. Oshikumungu eshi osha fiya oilyo yongudu ya topauka notai kanifa elineekelo mongudu kodoolopa oko. Swartbooi, oo a ninga kamusela pefimbo lomahoololo omudo 2025 omalelo eedoolopa noitopolwahoololo, okwa li a kufwa moilonga nokwa idikwa okukalela po ongudu melelo lodoolopa. Swartbooi okwa ti oshoongalele sha dundakana osho kwa li sha ningwa Olomakaya osha eta omuleli wongudu Bernadus Swartbooi a fidikilwe kopolifi neenghendabala dokukandula po omukundu ou Omaandaxa oda xulila mounyengwi. “Onda pula omutumba nelelo opo tu kandule po oshikumungu eshi pambili, tuha endulule vali osho sha ningwa koshoongalele shoshiwana, ashike eshi nda fika nongudu yange yovanhu vatano, okwa li nda lombwelwa Joseph Isaak, Rashied Rooinasie naAloys Appolus itava i mo momutumba shaashi ova tulwa pedu. “Ashike hamushanga wetu, David Eigub, omo a li noilyo i li 20 mwa kwatelwa nowanawino voipambele yoilonga, eekamusela okudja koMariental noLuderitz nosho yo ovaleli okudja kOvenduka. Okwa li ndi udite nda ponokelwa nokwa li ndi wete kutya itava dulu okufininika nge kutya nandi uye nalyelye omanga kwa li ve na onduba yovanhu i fike opo,” Swartbooi ta ti. Okwa ti ova kala va teelela ouyelele wokoikundaneki pombelewa yongudu ngaashi sha shiivifwa. “Ashike osho inashi ningwa potundi 11h00 ngaashi sha shiivifwa, okwa li sha undulilwa po15h00. Po15h00 kapu na ou e ya ndee otwa mona koFacebook kutya okwa li ve li komalungula okudja keumbo laEigub,” mayola mukulu ta ti. The post Oilyo yoLPM oyo ya ‘tulwa pedu’ ya kelelwa momutumba koKeetmanshoop appeared first on The Namibian .