Новиот албум на „Дуо Солипсе“ е посветен на музичкиот универзум на Клод Дебиси

Снимен во „Студио 150“ во Амстердам, албумот „Pour que la nuit…“ е замислен како поетско патување низ ноќта, создавајќи суптилни врски помеѓу Клод Дебиси и неколку значајни композитори од XX век: Тору Такемицу, Едисон Денисов, Мануел де Фаља и Томислав Зографски. Француско-македонското „Дуо Солипсе“ (Duo Solipse) е состав во кој музицираат Елена Стојческа на флејта и Ромен Петио (Romain Petiot) на гитара. Официјален датум на објавување на албумот „Pour que la nuit…“ е 5 јуни 2026 година, а издавач е „Солипсе рекордс“ (Solipse Records). Меѓу светлината и сенката, низ разновидни звучни пејзажи, албумот открива суптилна и контрастна палета на бои и тембри. Од современиот музички јазик на Денисов до тивките, речиси океански резонанции на Такемицу во „Toward the Sea“ за алт-флејта и гитара, програмата ги истражува различните лица на ноќта. Во срцето на проектот се наоѓа оригинален уметнички концепт: оживување на овој музички свет преку ансамбл за кој Дебиси никогаш не компонирал. Дуото претставува нови аранжмани, меѓу кои се издвојуваат редуцираната верзија на „Prélude à l’après-midi d’un faune“ (аранжман: Vincent Airault) и транскрипцијата на „Six Épigraphes antiques“ (аранжман: Ромен Петио), дела чии минијатурни форми особено природно се вклопуваат во звучноста на флејтата и гитарата. Овој дијалог го надополнуваат и две соло композиции: „Homenaje“ од Мануел де Фаља и „Invention ‘Syrinx’“ од Томислав Зографски. Ноќта е централната нишка што ги поврзува сите дела во програмата, создавајќи атмосфера која е истовремено соновна и непосредна. Иако е поставено на самиот крај од албумот, „Prélude à l’après-midi d’un faune“ претставува негов вистински извор и почетна точка – светлина на денот што ретроспективно го осветлува целото музичко патување. The post Новиот албум на „Дуо Солипсе“ е посветен на музичкиот универзум на Клод Дебиси appeared first on Слободен печат .