Ovanhu ve li 229 va kanifa eemwenyo davo moiponga yomeendjila

Oiponga yomeendjila i li 45, ovanhu va mona oiponga ve li 84 nomafyo e li ahetatu okwa li a didilikwa pokati komafiku 15 no21 Juni. Ouyelele ou owa dja molopota ya pitifwa kehangano olo hali ungaunga noiponga yomeendjila ledina Motor Vehicle Accident (MVA) Fund. Omwaalu owe ya pefimbo ehangano tali pula ovalongifi veendjila va kale noshinakuwanifa sheameno lomeendjila ndee tava lundulula omaliumbata avo meendjila doshiwana. Omukulunhuwiliki woshikondo shomakwatafano mehangano, John Haufiku, Etitatu okwa ti kutya pokati kefiku lotete laJanuali nomafiku 21 Juni neudo, Namibia okwa didilika oiponga yomeendjila i li 1 333, novanhu ve li 2 273 ova mona oiponga omanga ve li 229 va kanifila eemwenyo davo moiponga omo. Nande omwaalu ou li pombada, Haufiku okwa ti ou li xwepo pakuyelakanifa nefimbo olo tuu olo odula yandja ko. Okwa popya kutya oiponga oya shuna pedu neepelesenda di li 11, omwaalu wovanhu ovo va lemana owa shuna pedu neepelesenda 9 nomafyo aa shuna pedu neelepesenda 6. Ehangano ola ti ekanifo leemwenyo di li 229 moule weemwedi hamano otali kumwifa neenghono. “Eshi twa yuka metata lomudo, MVA Fund ota indile ovalongifi veendjila aveshe va tale nawa ekanifo leemwenyo dovanhu linyanyaleka moiponga yomeendjila nokukufa oshinakuwanifa sheameno lomeendjila moshilongo,” Haufiku ta ti. Haufiku natango okwa holola kutya pokati kaJanuali nomafiku 21 Juni, okwa didilikwa oiponga ya kwatela mo ovaendi vokolupadi i li 489, eshi osha eta ovanhu ve li 203 va lemane nomafyo e li 37. Ouyelele okudja kehangano natango owa holola kutya ovanhu okudja pomido 25 no29 ovo unene va kumwa koiponga ei tai popiwa, va kalela po omwaalu uhapu womafyo nomalemano. Haufiku okwa ti oshitopolwahoololo shaKhomas osha didilika omwaalu uhapu woiponga neudo, sha didilika oiponga i li 493, tashi landulwa kErongo noiponga i li 171 nOtjozondjupa noiponga i li 130. “Omwaalu owa holola kutya onghalo otai dulu okuxwepopala, ashike natango otau tu dimbulukifa yoo kutya eemwenyo dihapu oda kanena unene meendjila detu. Keshe oshiponga sha kelelwa osha xupifa ofamili. Keshe omwenyo wa xupifwa ou li efindano laNamibia. Eameno lomeendjila kali fi ashike oshinakuwanifa shovakwatelipo voveta ile omahangano eameno lomeendjila, oshinakuwanifa shakeshe umwe osho tashi pula elunduluko lomaliumbato mokati kovalongifi veendjila aveshe,” osho a ti ngaho. Haufiku okwa pula ovalongifi veendjila va ninge omahoololo omondjila va vatele okuninipika oiponga, omalemano nomafyo omeendjila. The post Ovanhu ve li 229 va kanifa eemwenyo davo moiponga yomeendjila appeared first on The Namibian .