ဖီဖာဟာ ကစားသမားတွေကို အပူဒဏ်အန္တရာယ်က လုံလောက်တဲ့ကာကွယ်မှုမပေး - သိပ္ပံပညာရှင်များ

၂၀၂၆ ခုနှစ် ကမ္ဘာ့ဖလား အမျိုးသား ဘောလုံးပြိုင်ပွဲမှာ လက်ရှိအသုံးပြုနေတဲ့ အပူဒဏ်ကာကွယ်ရေး အစီအမံတွေဟာ "မလုံလောက်ဘဲ" ကစားသမားတွေကို ဆိုးဆိုးရွားရွား ထိခိုက်မှုဖြစ်စေနိုင်တယ်လို့ ကမ္ဘာ့ထိပ်တန်းသိပ္ပံပညာရှင်အဖွဲ့ တစ်ဖွဲ့က ဖီဖာကို သတိပေးလိုက်ပါတယ်။

သုတေသီတွေရဲ့အိတ်ဖွင့်ပေးစာမှာ ကျန်းမာရေး၊ ရာသီဥတုနဲ့ အားကစား စွမ်းဆောင်ရည်ဆိုင်ရာ နိုင်ငံတကာကျွမ်းကျင်သူတွေက ဖီဖာရဲ့လမ်းညွှန်ချက်တွေဟာ လက်ရှိသိပ္ပံဆိုင်ရာ အချက်အလက်တွေနဲ့ ကိုက်ညီမှုမရှိဘဲ "ကျိုးကြောင်းဆီလျော်မှုမရှိ"တဲ့ အခြေအနေလို့ ဆိုပါတယ်။

ဖီဖာအနေနဲ့ ကစားသမားတွေအတွက် ပိုမို ပြည့်စုံ ကောင်းမွန်တဲ့ အကာအကွယ် အစီအမံတွေ ချမှတ်ပေးဖို့ သူတို့က တောင်းဆိုထားပြီး ပွဲစဉ်အတွင်း အပူလျော့အောင် အနားယူချိန်ကို ခပ်ကြာကြာပေးဖို့နဲ့ ပြင်းထန်တဲ့ရာသီဥတုအခြေအနေတွေမှာ ပွဲစဉ်တွေကို ရွှေ့ဆိုင်းတာ ဒါမှမဟုတ် ရပ်ဆိုင်းတာမျိုးအတွက် ရှင်းလင်းပြတ်သားတဲ့လုပ်ထုံးလုပ်နည်းတွေ ထည့်သွင်းပေးဖို့ တောင်းဆိုချက်တွေ ပါဝင်ပါတယ်။

အမေရိကန်၊ ကနေဒါနဲ့ မက္ကဆီကိုတို့မှာ အခုနွေရာသီမှာ ကျင်းပမယ့် ကမ္ဘာ့ဖလားပြိုင်ပွဲမှာ အပူရှိန်ဟာ ပြဿနာတစ်ရပ်ဖြစ်လာနိုင်ပြီး ကစားမယ့် ဘောလုံးကွင်း ၁၆ ကွင်းထဲက ၁၄ ကွင်းမှာ အပူချိန်ဟာ အန္တရာယ်ရှိနိုင်တဲ့အဆင့်ကို ကျော်လွန်နိုင်တယ်လို့ သုတေသီတွေက သတိပေးထားပါတယ်။

အမေရိကန်တောင်ပိုင်းနဲ့ မက္ကဆီကိုမြောက်ပိုင်းက နေရာတွေမှာ ပျမ်းမျှနေ့အချိန်အပူချိန်ဟာ ၃၀ ဒီဂရီစင်တီဂရိတ် ရှိနိုင်ပြီး အပူလှိုင်း ကျချိန်တွေမှာ ၄၀ ဒီဂရီစင်တီဂရိတ်အထိ မြင့်တက်နိုင်ပါတယ်။

အပူချိန်၊ စိုထိုင်းဆ၊ လေတိုက်နှုန်းနဲ့ နေရောင်ခြည်ရဲ့ပြင်းအားတို့ကို ထည့်သွင်းတွက်ချက်မယ်ဆိုရင် ကမ္ဘာ့ဖလားပွဲ ကျင်းပမယ့် မြို့တွေမှာ ကစားသမားတွေဟာ အပူဒဏ်ကြောင့် ခန္ဓာကိုယ်ထိခိုက်မှုကို ဆိုးဆိုးရွားရွားဆုံးခံစားရနိုင်ခြေ ရှိပါတယ်။

ဖီဖာက "ကစားသမား၊ ဒိုင်လူကြီး၊ ပရိသတ်၊ စေတနာ့ဝန်ထမ်းနဲ့ ဝန်ထမ်းတွေရဲ့ကျန်းမာရေးနဲ့ ဘေးကင်းလုံခြုံမှုတွေကို ကာကွယ်ပေးဖို့ ကတိပြုထားပြီး" ပြိုင်ပွဲစီစဉ်မှုရဲ့တစ်စိတ်တစ်ပိုင်းအနေနဲ့ ရာသီဥတုရဲ့သက်ရောက်မှုတွေကိုလည်း ကြိုတင်သုံးသပ်လေ့လာထားတယ်လို့ ပြောပါတယ်။

ဘယ်လို ရာသီဥတု အခြေအနေမှာပဲ ဖြစ်ဖြစ် "ကစားသမားတွေ သက်လုံကောင်းဖို့" ပြိုင်ပွဲအတွင်း ပွဲစဉ်တိုင်းရဲ့ ပုံမှန်နားချိန် ၁၅ မိနစ်အပြင် ပထမပိုင်းနဲ့ ဒုတိယပိုင်း ကန်ချိန်တွေရဲ့ အလယ်မှာ ကိုယ်ခန္ဓာအပူချိန် လျှော့ချဖို့ သုံးမိနစ်စီအနားပေးချိန်ကို ဖီဖာက မဖြစ်မနေထည့်သွင်း ထားပါတယ်။

အဆောက်အအုံအပြင်မှာ ကစားတဲ့ကွင်းပွဲတွေအားလုံးမှာ နည်းပြအဖွဲ့တွေနဲ့ အရန်ကစားသမားတွေအတွက် ရာသီဥတု အပူအအေးဒဏ်ကို ထိန်းချုပ်ပြီး သက်သောင့် သက်သာ ရှိစေမယ့် ခုံတန်းတွေ ထားရှိပေးသွားမှာ ဖြစ်ပါတယ်။

အားကစားအတွက် ရွှေစံနှုန်းဖြစ်တဲ့ Wet Bulb Globe Temperature (WBGT) ကို ဖီဖာက အသုံးပြုပါတယ်။ WBGT ဆိုတာကတော့ ရုပ်ပိုင်းဆိုင်ရာ အပူဒဏ်ကို တိုင်းတာ၊ ခန္ဓာကိုယ် အပူချိန်နဲ့ စိုထိုင်းဆကို ပေါင်းစပ်ထားတာ ဖြစ်ပါတယ်။ WBGT ၂၈ ဒီဂရီစင်တီဂရိတ်ဝန်းကျင်ကို ထိပ်တန်းအားကစားသမားတွေအတွက် အပူဒဏ်စိုးရိမ်ရတဲ့အဆင့်အဖြစ် သတ်မှတ်ထားပါတယ်။

ဖီဖာရဲ့ အရေးပေါ်စောင့်ရှောက်မှုလက်စွဲအရ WBGT ဟာ ၃၂