Eron Kuvayt va Bahrayn tomon yettita ballistik raketa uchirdi.

AQSh Markaziy qo‘mondonligi (CENTCOM) Eron Kuvayt va Bahrayn yo‘nalishida yettita ballistik raketa uchirganini ma’lum qildi. Amerika harbiylariga ko‘ra, raketalarning oltitasi havoda yo‘q qilingan, yana biri esa nishonga yetib bormagan.

CENTCOM'ning dastlabki baholashlariga ko‘ra, hujum vaqtida uchirilgan yettita raketadan oltitasi havo hujumidan mudofaa tizimlari tomonidan to‘sib qolingan. Qolgan bitta raketa esa belgilangan nishonga yetib bormagan.

Ayni paytda Eron Islom inqilobi muhofizlari korpusi (IIMK) voqealar rivojiga o‘z munosabatini bildirdi. Korpus ma’lumotiga ko‘ra, shanbaga o‘tar kechasi to‘rtta neft tankeri Tehron bilan kelishmasdan Ho‘rmuz bo‘g‘ozi orqali harakatlanishga uringan.

IIMK da’vo qilishicha, mazkur tankerlardan biri zarbaga uchrab to‘xtatilgan, qolgan uchta kema esa ortga qaytishga majbur bo‘lgan.

Eron harbiylari bayonotida qayd etilishicha, shundan so‘ng AQSh kuchlari mintaqadagi radiolokatsiya obektlariga havo zarbalari bergan. Bunga javoban IIMK Kuvaytdagi AQSh harbiy bazasi hamda Bahraynda joylashgan AQSh Beshinchi floti qarorgohiga ballistik raketa zarbalari berganini ma’lum qilgan.

Hozircha mazkur hujumlar oqibatida qurbonlar yoki yirik vayrongarchiliklar haqida rasmiy ma’lumot berilmagan.

Kuzatuvchilar fikricha, Ho‘rmuz bo‘g‘ozi atrofidagi vaziyatning keskinlashishi Fors ko‘rfazida xavfsizlikka oid xavotirlarni yanada kuchaytirmoqda. Chunki ushbu bo‘g‘oz dunyo neft va gaz savdosining muhim qismi o‘tadigan strategik dengiz yo‘li hisoblanadi.

Tomonlarning o‘zaro zid bayonotlari voqealarning haqiqiy ko‘lami va oqibatlari yuzasidan mustaqil tasdiqlangan ma’lumotlar hali to‘liq mavjud emasligini ko‘rsatmoqda.