Nainda a talela po omuvelo waTrans-Kalahari

Komufalandjai ta vatele wopolifi, Anne-Marie Nainda, okwa li a talela po oTrasn-Kalahari Border Post Etine. She likolele kouyelele wa yandjwa kopolifi moshitopolwahoololo shaMaheke, elalakano letalelepo lakomufalandjai okwa li okukundafana novanambelewa ovo ve li keengaba daNamibia naBotswana nokukonakona onghalonawa nonghalo yoilonga yovanambelewa vopolifi ovo hava longele keengaba. Nainda okwa li a enda pamwe novanambelewa vakula vopolifi nokwa li a tambulwa ko kuFestus Shidute, omunambelewa koTrans-Kalahari Border Post. Shidute okwa yandja ouyelele uhapu tau popi kombinga yondjokonona yokeengaba, oilonga yako, oinyangadalwa yewiliko lokeengaba neepolohalama, omikundu, nosho yo omafaneko omayambukepo omonakwiiwa. Ongudu ei natango okwa li ya talela po omaumbo ovanailonga vokeengaba moNamibia nokoBotswana. Nainda okwa pandula ovanailonga aveshe vokeengaba novapolifi molwelitulemo lavo ndee te va pula va twikile nokulonga nawa oilonga yavo pamufika woilonga. Natango okwa popya kutya etalelepo laye okwa li tali lalakanene okuyambidida, nokukwashilipaleka oilonga yopamufika nefimano lokukwatela po omilandu deameno diwa opo oipindi keengaba iha katekwe. Ongudu ei natango okwa li ya talela po oshitaashi shopolifi koBuitepos oko Nainda a pandula nokutwa omukumo oshitaashi shi twikile oilonga iwa nande oshi na omikundu donhumba nomumbwe yoilongifo. – NAMPA The post Nainda a talela po omuvelo waTrans-Kalahari appeared first on The Namibian .