Ovakainhu nava pewe efano liwa koikundaneki – Kuugongelwa-Amadhila

Omunashipundi wOmutumba wOpashiwana Saara-Kuugongelwa-Amadhila okwa indila omahangano oikundaneki a xwepopeke omukalo oo haa longifa okukundaneka kombinga yovakainhu, unene ngaa ovo ve li momalelo. Eshi kwa li ta popi koshivilo shedimbuluko ledalo lehangano loNamibian Broadcasting Corporation (NBC) eshi la wanifa omido 35 Etitano, Kuugongelwa-Amadhila okwa ti omahangano oikundaneki luhapu ohaa kundaneke oinima ya kilikita ihe li mondjila, omaliumbato opaumwene nomasheko a kwatela mo ovakainhu omanga itaa tale nawa kekufombinga lao lopamufika moshiwana. Okwa londwela kutya okulopota kwoludi olo oku na oilanduli ya mana mo moshiwana. “Oinima ei kai wa. Ohai teya po elineekelo loshiwana movaleli vovakainhu, nokuteya po omukumo wovakainhu ovo,” osho a ti ngaho. Omunashipundi okwa ti okuyandja omafano ai kovakainhu kwakeshe efiku ohaku va teya omukumo vaha kufe ombinga moipambele yoshiwana. “Omahangano oikundaneki ihaa lopotele ashike ounyuni; ohaa tungu po yo eudeko loshiwana,” osho a ti ngaho. Kuugongelwa-Amadhila okwa ti oikundaneki oi na oshinakuwanifa shokukwashilipaleka kutya ovakainhu otava konakonwa she likolelela koilonga yavo ponhele yoinima ya kilikita yopaumwene. Okwa pula okulopota ku na ouyuki noku li mondjila. “Onghee nee ohandi indile oNBC monghatu ei a tale moule oimilandu davo dokunyanyangida oinima ya pamba oukakwashikekookanhu,” osho a ti ngaho. Omunashipundi natango okwa holola elimbililo kombinga yoimbuluma tai ningilwa ovakainhu komalungula, mwa kwatelwa omalushindo, oipupulu, okulongifa omauyelele avo shihe li paveta noikonga yomauyelele ehe li mondjila ya longekidwa. Okwa ti omaponokelo a tya ngaho otaa fininike unene ovakainhu va dje ko komalungula nopaemhito dimwe, vaha kufe ombinga moshiwana. “Oshilanduli shakeshe efiku osheshi kutya ovakainhu ohava di ko komalungula ile va ninipike ekufombinga lavo. “Efimbo limwe, ohava fiye po oinima yoshiwana filufilu,” osho a ti ngaho. Omunashipundi okwa indila omahangano oikundaneki opashiwana a kufe ko oshikumungu eshi nelitulemo opo a ninipike oinyolwa ihe li mondjila nokuxwaxwameka omaliumbato awa okomalungula. Okwa ti oikundaneki oi na oshinakuwanifa shi na eenghono shokuyukililifa eenghedi dopanghalafano nokutota omudingonoko wopashiwana wovakainhu omo ovakainhu tava dulu okukufa ombinga va manguluka mopolitika, moilonga nomelelo loshiwana. Okwa londwela vali kutya okulopota kwa puka kwoinima ya fimana otaku dulu okweeta eemhata moshiwana nokunghundipaleka ekalelepo loinima moshiwana shoudemokoli. The post Ovakainhu nava pewe efano liwa koikundaneki – Kuugongelwa-Amadhila appeared first on The Namibian .