६ दिने ब्लाइन्ड फुटबल प्रशिक्षण कार्यक्रम सम्पन्न

काठमाडौंमा दृष्टिविहीन तथा न्यून दृष्टि भएका व्यक्तिहरूका लागि लक्षित ६ दिने ब्लाइन्ड फुटबल प्रशिक्षण कार्यक्रम सफलतापूर्वक सम्पन्न भएको छ। काठमाडौं महानगरपालिका वडा नं. ३० को आर्थिक सहयोग र सक्षम नेपाल, ज्ञानेश्वरको व्यवस्थापनमा उक्त तालिम सञ्चालन गरिएको थियो। जेठ २० गतेदेखि सुरु भएको यो प्रशिक्षण कार्यक्रम जेठ २५ गते समापन भएको हो। ज्ञानेश्वरस्थित प्राइम फुटसलमा दैनिक रूपमा सञ्चालित यस कार्यक्रमले सहभागीहरूलाई फुटबलको आधारभूत सीप र खेल कौशलको विकास गराउन मद्दत गरेको छ। खेलकुदको माध्यमबाट दृष्टिविहीन व्यक्तिहरूको शारीरिक तथा मानसिक क्षमता अभिवृद्धि गर्ने उद्देश्यले यो कार्यक्रम आयोजना गरिएको हो।

यस प्रकारका खेलकुद कार्यक्रमले दृष्टिविहीन व्यक्तिहरूलाई समाजको मुख्य धारमा समावेश गर्दै उनीहरूको आत्मविश्वास र खेल प्रतिभालाई उजागर गर्न महत्त्वपूर्ण भूमिका खेल्छ।